कुचबिहारमा दुर्लभ प्रजातिको कछुवा बचाव

कुचबिहार, डिसेम्बर २५ (सिलगढी जर्नल) – कुचबिहारमा दुर्लभ प्रजातिको कछुवा उद्धार गरिएको छ। कुचबिहारको 19 नम्बर वार्डका निवासी प्रीतम दास कालीघाट घोरमारा क्षेत्रमा घुम्न जाँदा एक व्यक्तिले कछुवा बेचिरहेको देखे। प्रीतमले उक्त कछुवा 100 रुपियाँमा किनेर घर लगे। पछि उनले स्थानीय मोहन रक्षा कमिटीलाई यसबारे जानकारी दिए। मोहन रक्षा कमिटीका सदस्यहरू र वन विभागका कर्मचारीहरू आज प्रीतमको घर आएर कछुवा उद्धार गरेर लगे।

सबैजनाले प्रीतमको यो कार्यको प्रशंसा गरे। मोहन रक्षा कमिटीका महासचिव रञ्जन शीलले भने, “यो प्रजातिको कछुवा विशेषगरी पाइँदैन। प्रीतमले निकै सराहनीय कार्य गरेका छन्। यदि सबैको यस्तै सोच भए, हामीले दुर्लभ प्रजातिका कछुवाहरूलाई बचाउन सक्छौं।” उद्धार गरिएको कछुवाको जाँचपछि उपयुक्त ठाउँमा छोडिने कुरा वन विभागका कर्मचारी दुलाल दासले बताए।